Qo‘llanma

Kabinet va metadata bilan ishlash

Qo‘llanma tashkilotning mas’ul xodimlari uchun. U yozuv kiritishdan uni yangilashgacha bo‘lgan kundalik ishlarni qamrab oladi.

Kabinetga kirish

Hisob ma’lumotlari kelishuv rasmiylashtirilgandan so‘ng mas’ul xodimga rasmiy aloqa kanali orqali yuboriladi. Birinchi kirishda parolni almashtirish va ikki bosqichli tasdiqni yoqish talab qilinadi.

Kabinet manzili: kabinet.nationaldri.uz. Hisob faqat tashkilot xodimlariga beriladi; hisobni uchinchi shaxslarga berish taqiqlanadi.

Yozuv kiritish

“Yangi yozuv” bo‘limini oching va nashr turini tanlang.

Majburiy maydonlarni to‘ldiring: sarlavha, mualliflar, manba, sana, til.

Annotatsiya va kalit so‘zlarni kiriting — ular qidiruv sifatini sezilarli oshiradi.

Ma’lumotlarni asl nashr bilan solishtirib tekshiring va yuboring: avtomatik tekshiruvdan o‘tgach DRI darhol beriladi.

Tekshiruv holatlari

Qoralama

Yozuv saqlangan, lekin hali yuborilmagan. Ommaga ko‘rinmaydi.

Tekshirilmoqda

Avtomatik tekshiruv bosqichida. U yuborilgan zahoti bajariladi; qo‘lda tasdiqlash yo‘q.

Tasdiqlangan

DRI berilgan, yozuv ochiq reyestrda ko‘rinadi.

To‘g‘rilash talab etiladi

Kamchilik darhol ko‘rsatiladi, DRI berilmaydi; tuzatilgach yozuv qayta yuboriladi.

Yozuvni yangilash

Metadata xatosi topilsa yoki manba manzili o‘zgarsa, yozuv tahrirlanadi. Identifikator o‘zgarmaydi: pasport sahifasida faqat “Oxirgi yangilanish” sanasi yangilanadi. Maqola noto‘g‘ri songa yuklangan hollardagina yangi asosiy DRI beriladi; avvalgisi saqlanadi va unga yo‘naltiradi. Yozuvni butunlay o‘chirish mumkin emas.

Ommaviy yuklash

Katta hajmdagi yozuvlar CSV shabloni yoki API orqali yuboriladi. Shablon kabinetdagi “Ommaviy yuklash” bo‘limidan olinadi; ustunlar nomi o‘zgartirilmasligi kerak.

file;type;journal_code;conference_code;volume;number;year;article_no;title;title_en;abstract;abstract_en;authors;language;keywords;udc;pages_first;pages_last;published_date;license;target_url;ejournal_available;references

Mualliflar va kalit so‘zlar nuqtali vergul (;) bilan, adabiyotlar esa vertikal chiziq (|) bilan ajratiladi.

Tez-tez uchraydigan xatolar

Manba havolasi ochilmayapti

Havola ochiq bo‘lishi va avtorizatsiya talab qilmasligi kerak. Ichki tarmoq manzillari qabul qilinmaydi.

Mualliflar tartibi noto‘g‘ri

Tartib asl nashrdagidek bo‘lishi shart; alifbo bo‘yicha qayta tartiblash mumkin emas.

Bir nashr uchun ikkinchi yozuv

Tizim takrorni aniqlaydi va yozuvni rad etadi. Mavjud yozuvni tahrirlash kerak.

Sarlavhada ortiqcha belgilar

Sarlavha faqat matndan iborat bo‘ladi: HTML teglari, ortiqcha bo‘shliq va katta harflar bilan yozilgan butun sarlavha qabul qilinmaydi.

Texnik integratsiya rejalashtirilayotgan bo‘lsa, API hujjatlari va sinov muhitidan foydalaning.

API va integratsiya